సూర్యవంశీని అవుట్ చేశాక జేమీసన్ 'అతి'... రాజస్థాన్ రాయల్స్ కోచ్ రియాక్షన్

ఐపీఎల్ 2026లో యువ సంచలనం, 15 ఏళ్ల వైభవ్ సూర్యవంశీని ఔట్ చేసిన తర్వాత ఢిల్లీ పేసర్ కైల్ జేమీసన్ కాస్త 'అతి' చేయడంపై రాజస్థాన్ రాయల్స్ బ్యాటింగ్ కోచ్ విక్రమ్ రాథోడ్ ఆసక్తికరంగా స్పందించాడు. జేమీసన్ చర్యను విమర్శగా కాకుండా, వైభవ్‌కు దక్కిన ఒక 'కాంప్లిమెంట్'గా చూడాలని పేర్కొన్నాడు. జేమీసన్ చర్య ద్వారా వైభవ్ ఎంతటి ప్రమాదకరమైన ఆటగాడో అర్థమవుతోందని వ్యాఖ్యానించాడు.

జైపూర్ వేదికగా మే 1న ఢిల్లీ క్యాపిటల్స్‌తో జరిగిన మ్యాచ్‌లో ఈ ఘటన చోటుచేసుకుంది. ఇన్నింగ్స్ ఆరంభంలోనే వైభవ్ సూర్యవంశీ (4) పదునైన యార్కర్‌తో కైల్ జేమీసన్ క్లీన్ బౌల్డ్ చేశాడు. అనంతరం, ఆ యువ బ్యాటర్‌ వైపు దూకుడుగా తిరిగి ఏదో అంటూ దూకుడుగా సంబరాలు చేసుకున్నాడు. ఈ ఘటనపై సోషల్ మీడియాలో విమర్శలు వెల్లువెత్తాయి. ఒక యువ ఆటగాడి పట్ల ఇలా ప్రవర్తించడం సరికాదని పలువురు అభిప్రాయపడ్డారు.

అయితే, మ్యాచ్ అనంతరం ప్రెస్ కాన్ఫరెన్స్‌లో మాట్లాడిన విక్రమ్ రాథోడ్, ఈ వివాదానికి తనదైన శైలిలో ముగింపు పలికాడు. "సీజన్‌లో అద్భుతంగా రాణిస్తున్న మా ఓపెనర్‌ను త్వరగా ఔట్ చేశానన్న ఆనందం జేమీసన్‌లో కనిపించింది. వైభవ్‌ను ఔట్ చేసినందుకు అతను అంతగా సంతోషించాడంటే, అది వైభవ్‌కు దక్కిన ఒక ప్రశంస, కాంప్లిమెంట్" అని రాథోడ్ వివరించాడు. ప్రతి మ్యాచ్‌లోనూ వైభవ్ భారీ స్కోర్లు చేయాలని ఆశించడం సరికాదని, ఒక మంచి బంతికి ఎవరైనా ఔట్ కావొచ్చని యువ ఆటగాడికి మద్దతుగా నిలిచాడు.

ఈ మ్యాచ్‌లో తొలుత బ్యాటింగ్ చేసిన రాజస్థాన్ రాయల్స్, ఓపెనర్లు యశస్వి జైస్వాల్, వైభవ్ సూర్యవంశీ విఫలమైనప్పటికీ, 20 ఓవర్లలో 6 వికెట్లకు 225 పరుగుల భారీ స్కోరు చేసింది. కెప్టెన్ రియాన్ పరాగ్, ధ్రువ్ జురెల్, డోనోవాన్ ఫెరీరా అద్భుతంగా రాణించి జట్టును ఆదుకున్నారు. అయితే, ఈ లక్ష్యాన్ని ఢిల్లీ క్యాపిటల్స్ కేవలం 19.1 ఓవర్లలో 3 వికెట్లు కోల్పోయి ఛేదించింది. ఈ ఓటమిపై రాథోడ్ అసంతృప్తి వ్యక్తం చేశాడు. మంచి స్కోరు చేసినప్పటికీ, బౌలర్లు మరోసారి తమ ప్రణాళికలను అమలు చేయడంలో విఫలమయ్యారని, ముఖ్యంగా పవర్‌ప్లేలో తేలిపోయారని విమర్శించారు. అయితే, ఓపెనర్లపైనే ఆధారపడకుండా మిడిల్ ఆర్డర్ రాణించడం సానుకూలాంశమని పేర్కొన్నారు.